Arkano

2015. urtean Red Bull Batalla de los Gallos norgehiagokaren nazioarteko finalean garaile izan zen eta, geroago, Guinness errekor bat ere lortu zuen: 24 orduz rapeatzen jardun zuen, etenik gabe. Gaur egun, musika-proiektuan buru-belarri dabil eta, aldi berean, telebistan, irratian eta freestyle-ko emanaldiak ere egiten ditu.

Bnet

2019ko Red Bull Batalla de los Gallos norgehiagokan txapeldun izendatu berria, azken urtean proiekzio eta hazkunde handiena izan duen MCa da.

Dellafuente

Dellafuentek badu oso jende gutxik duen ahalmen berezi bat: ukitzen duen oro moda eta joera bihurtzen du, nahiz eta misterio kutsu batez inguratuta dagoen beti; horrenbestez, Espainiako eszena urbanoan ezinbesteko figura bihurtu da. Bi album argitaratu ditu bere kabuz (‘Azulejos de Corales’ eta ‘Ansia Viva’) eta, horietaz gain, gaur egungo artista handiekin ere egin izan ditu kolaborazioak, hala nola C. Tangana (‘Guerrera’, ‘Paris’), Mala Rodriguez (‘Tenamoras’) edo Novedades Carminha (‘Ya No Te Veo’); bere ekoizpenetan beti aurkituko ditugu flamenkoaren, traparen edo soinu latinoenen bere interpretazio pertsonalak. Zerekin harrituko ote gaitu hurrengo hilabeteetan?

Dj Verse

Nazioko eta nazioarteko norgehiagoketan erreferentea da DJ hau, eta beat-etan estiloen arteko fusioa egitea du bereizgarri.

Don Patricio

El Hierron jaio zen 1993. urtean, eta Locoplaya taldearekin (Bejo eta Ugerekin osatzen duen hirukoa da, eta 2012ko Goya sarietan abesti onenaren sarirako hautagai izan ziren) etapa oso aktiboa igaro ostean, aurten lortu du Patricio Martínek Spotify-ko Top 50 orokorreko lehenengo postura iristea, ‘Contando Lunares’ arrakastari esker. Abesti hori bakarkako lehen lanean dago, ’La dura vida del joven rapero’ diskoan, eta gaur egungo gazteen gaiak lantzen ditu, betiere jatorri kanariarraren eraginpeko ikuspegitik begiratuta; bere diskurtsoan, freskotasunez eta zorroztasunez betetako adarjotze hip-hoperoak aurki ditzakegu, baina baita reggaeton mantso-mantsoa eta rap lasaiena ere.

Dupla

Letra esplizituak, ukitu elektronikoak dituen pop-a eta hip-hop estetika dira DUPLAren bereizgarriak; Dupla proiektua 2018. urtearen amaieran sortu zen landa-giroan. Antzerkiaren eragin handia duen moduan mugitzen dira agertokian bi aguraindarrak (gitarra eta ahotsa), eta beren lehen EPko abestiak aurkeztuko dituzte Donostia Festibalean; lehen lan hori hilero argitaratu izan dituzten ikus-entzunezko piezetan oinarrituta osatu dute.

Fernandocosta

FERNANDOCOSTAren karrera oso indartsu hasi da. 4 urte baino ez daramatza musikaren bidean, baina dagoeneko nazioko rap munduan erreleboa hartzen ari diren artisten labealdi berriko adierazgarri garrantzitsuenetako bat dela esan daiteke.  Youtube-n lortu dituen zenbakiak ikusi baino ez dago; gehien entzundako diskoen zerrendetako goiko postuetan kokatzera iritsi da eta, show bakoitzean ongi erakusten duenez, eskarmentu handia du oholtza gainean. Ibizako mc-ak sarrera guztiak agortu ditu hilabeteetako biraren barruan emanaldiak eskaini dituen ia hiri guztietan, eta batzuetan emanaldia bikoiztu ere egin behar izan du. Donostia Festibalaren hurrengo edizioan erritmoz gainezka etorriko zaigu.

Funzo & Baby Loud

Besteak beste, ‘Y cuando pienso en ti’, ‘Kelejodan’ edo ‘Malibú con piña’ berriagoari esker iritsi dira bi anaia alacantarrak musika urbano nazionaleko belaunaldi berriaren podiumera. 2020an ‘Amor de vampiro’ izeneko lehen diskoa argitaratuko dute, beren hitzetan ‘trap alternatiboko’ abestiekin. Gazteak diren arren (22 eta 16 urte), ez dute aurreiritzirik abestiak sortzeko garaian, eta pop gaiak, erritmo latinoak eta beat itsaskorrak uztartzen dituzte beren esperientziak, nerabe ororen esperientziak transmititzeko.

Green Valley

Dancehall eta reggae estiloetan oinarrituta eratu dute sei musikari arabar eta katalan hauek beren musikaren ekosistema. 2010. urtean ‘En tus manos’ lehen diskoa argitaratu zenetik, Green Valley taldearen gorakada meteorikoa izan da, mezu positiboei eta aldarrikapenez jositako letrei esker; eta mezu eta letra horien guztien bitartez, hain justu, geure kontzientzia kritikoa zirikatu eta hausnarketa eginaraztea da taldearen helburua. Donostia Festibalean arrakasta ezagunenak ez ezik, 2019ko apirilean kaleratutako ‘Bajo la piel’ azken laneko abestiak ere entzuteko aukera izango dugu.

Guitarricadelafuente

Álvaro Lafuente dago Guitarricadelafuente izenaren atzean, eta jendearentzat, oro har, ezezaguna izan da duela hilabete gutxi arte, hau da, bere abestiak Instagram sare sozialera igotzen hasi zen arte; harrezkero, areto ertainak lepo betetzen ditu. Gitarra eta ahotsa lagun dituela, gazte-gaztea izanik ere, urte gehiago dituztenek Antonio Vegaren eta klasiko latinoamerikarren argia ikusten dute harengan; aldiz, gazteenek Z belaunaldiarentzako erreferente berria ikusten dute hogei urte inguruko aragoiar honengan.

Hakima Flissi

Soul, R&B, reggae, funk eta baita afrobeat ukituak ere; estilo horiek guztiak aurki ditzakegu Hakima Flissi artistaren proposamen erakargarrian. Berezko talentu bizi bezain gozoa duen artista bilbotar gazte hau gaur egungo musika urbanoaren figura berri garrantzitsuenetako bat izatera iritsi da.

Huntza

Unibertsitate-giroan sortu zen talde gipuzkoarra 2014. urtean eta, orain, urteak igaro diren honetan, Huntza euskal zirkuituko talderik errespetatuenetako bat izatera iritsi da. Trikitixa, pop-rock-a eta ska dantzagarria uztartzen dira seikote honen musikan; izan ere, folklorea biziberritzeaz eta mestizajeaz gain, sustraidun musikari ukitu pertsonala ematea lortu dute.

Kase.O

Hamahiru urterekin hasi zen maketak grabatzen eta, harrezkero, Javier Ibarra gaztelaniadun MCrik garrantzitsuenetako bat bihurtu da eta nazioko hip hoparen historia aldatu du. Zazpi disko grabatu ditu estudioan Violadores del Verso taldearekin batera, eta generoko artista ugarirekin jardun du elkarlanean (SFDK, Mala Rodriguez, Xhelazz, Sho-Hai…); bakarkako azken lana ‘Dentro del Círculo’ da, disko bikoitza, eta Madrilgo WiZink Center aretoan eta Zaragozako Príncipe Felipe aretoan eskainitako zuzenekoen grabaketa ere biltzen du, remixak eta abesti berriak, baita dokumental bat ere, ‘El Círculo’ lana sortzeko, grabatzeko, ezagutarazteko prozesua eta horren ondoko bira ere biltzen dituena: ‘El círculo (2016).

La Furia

Rap feministaren aitzindari, bere ahots garbi eta urratuari esker, koru gotikoei, erritmo amorratuari eta, batik bat, letra biziki oldarkorrei esker, La Furiaren abestiak tresna artistiko ezin hobeak dira pentsamoldea zabaltzeko eta gauzak zalantzan jartzeko. 2013. urtean ‘No hay clemencia’ lehen diskoa argitaratu ostean, bere kode propioak asmatu behar izan zituen ordura arte emakumerik izan ez zen agertokietara igotzeko ausardia izan baitzuen, betiere ulertezintasunaren, anarkiaren, feminismoaren eta amorruaren mezua ezpainetan josita, errima zorrotz eta iaioekin.

Lola Indigo

Zalantzarik gabe, azken urtean Espainiako errebelazio garrantzitsuena izan da Lola Índigo, eta bere ahaleginari eta konstantziari esker, karisma handia eta arrakastaz betetako errepertorioa uztartuta, musikari orok duen erronka zailenetako bat lortu du: ikus-entzule mainstream-enak independenteekin bat egitea. Akelarre albuma 1. postura iritsi zen salmenta fisikoak, digitalak eta streaming-a kontuan hartuta, eta platinozko sei disko eta urrezko bost lortu ditu bere singleekin, besteak beste, ‘Ya no quiero na’, ‘Lola Bunny’ (Don Patricio-rekin batera) edo ‘Mujer Bruja (Mala Rodríguez-ekin batera) abestiekin. Urtebetean, 80 hiri baino gehiagotan barrena eta nazioko nahiz Latinoamerikako 35 jaialditan ibili da, indarrez, musikaz eta koreografiaz betetako show-a eskainita, geldiezina izateko itxura guztia duen gorakada batean.

Los Chikos del Maíz

2016. urtean geldialdia egin ostean, gaztelaniaz egindako rap politikoaren adierazgarri handienetakoa bueltan da berriro, ‘Comanchería’ lan berriarekin; disko horretan, lagun askoren laguntza izan dute: besteak beste, Ana Tijoux, Zatu de SFDK edo Kase.O. Taldea Valentzian sortu zen 2004. urtean, honako kide hauekin: El Nega (Ricardo Romero, MC eta ekoizlea), Tony El Sucio (Toni Mejias, MC) eta DJ Bokah (DJ eta ekoizlea), eta lotsagabe, borrokalari eta polemikoak izan dira beti; izan ere, lehen aldiz gurasoak baino baldintza okerragoetan biziko den belaunaldi galdu horren bozgorailu bihurtu dira, etxebizitza duina aldarrikatu eta banku nahiz merkatuen tirania salatzen duen etorkizunik gabeko masa prekario horren ahots bihurtu dira.

Mafalda

Turia ibaiaren inguruko zortzi herrietako musikariz osatutako Mafalda taldeak hamar urte bete ditu agertokien gainean, eta urteurrena ospatzeko ‘X’ izeneko diskoa kaleratu dute taldekideek, jarrera oldarkorra eta protesta sozialez jositako letrak lagun dituztela beti. Hainbat estiloren arteko fusioa egiten dute: ska, reggae, funk eta hardcore, eta "Reggaecore” esaten diote euren estiloari.

Morad

Proiektu bat modu organikoan sortu daiteke, atzean zigilu handien babesik izan gabe, baldin eta egia eta emozioa transmititzen baditu; horren adibide dugu Morad. L'Hospitalet-eko gazte honek bere auzoko gazteen egia eta sentipenak islatzen ditu abestien bitartez, autentikotasunez betetako rap frantsesen erritmora. Asmo handirik gabe abiarazitako proiektu hau platinozko diskoa lortzera iritsi da $kyhook-ekin batera produzitutako ‘A escondidas’ abestiarekin; abesti horretaz gain, lehen albuma argitaratzeko adina abesti bildu ditu jada, eta 'M.D.L.R.' ('Mec de la rue', kaleko mutila, frantsesez) diskoa kaleratu du, Steve Lean-en laguntzarekin.

Nil Moliner

Nil Moliner-ek 2008. urtean ekin zion bakarkako bideari, 15 urte zituelarik: beste artista batzuen bertsioak jotzen zituen tabernetan. 2017ko otsailean ‘Hijos de la Tierra’ lehen EPa grabatu zuen; berak konposatu eta idatzitako lana izan zen, energiaz eta baikortasunez betetakoa, erritmo latino leunak pop espainiarrarekin nahasten dituena. Bete-betean asmatu zuen formularekin. Gaur egun, 12 milioi erreprodukzio baino gehiago ditu. Denbora gutxi behar izan du Nil Moliner-ek Estatuko eszenako erreferentziako kantautoreetako bat bihurtzeko. Lehen lana argitaratu gabe izanik oraindik, bira bat egin du eta sold out ugari lortu ditu bartzelonar honek; ziur bere belaunaldiko figura garrantzitsuenetakoa izango dela.

Skone

Freestyle-aren munduan hamarkada bat baino gehiago daraman honek 2016. urtean irabazi zuen Red Bull Batalla de los Gallos nazioarteko saria; orain, nazioarteko lehiaketetan parte hartzen du eta telebistan ere hasia da.

Víctor Rutty, Rober del Pyro y Dj Kaef

‘Gatos Negros’ izena du Victor Rutty, Rober del Pyro eta Dj Kaef burgostarren lehen lanak. 2018. urtean argitaratu zuten, eta etxeko marka peto-petoa duten zortzi abesti biltzen ditu, Acción Sánchez (SFDK) eta Baghira-ren produkzioekin; Toteking, Bach edo Die Kie-ren ohiko produktore da Baghira. Espainia osoan eta Latinoamerikan barrena kontzertuak egin ostean, euren muinari, malenkoniari eta bizitzaren gaineko hausnarketei eusten diete, 2015. urtean hasi zirenetik aldatu gabe, eta horixe erakutsiko digute uda honetan Donostia Festibalean, azkeneko diskoko lanekin, baita ‘Orígenes’ eta ‘Orígenes Mixtape’ diskoetakoekin ere.

Zasko Master

Red Bull Batalla de los Gallos 2019ko nazioko gaur egungo txapeldunaren indargunea metrikak dira; Alacanteko MC honek "Slipping Upp” izeneko kantua kaleratu zuen iaz.

Zetak

Zetak proiektuarekin, Pello Reparaz musikari, konpositore eta produktoreak alde batera utzi ditu Vendetta bere aurreko taldearen oihartzun jamaikarrak; proiektu honetan, musika elektronikoa oinarri hartuta, melodia itsaskorrak eta erritmo dantzagarri eta oszilatzaileak sortu ditu. Iruñeko Leire Colomo perkusioarekin, Gorka Pastor sintetizadorearekin eta Baionako Iban Larreburru bateria-jotzailea igotzen dira agertokira Arbizukoarekin batera. Pellok berak dioenez, Zetak “musika-proposamen desberdina da, desberdin sentitzen den jendearentzat”, eta gu proposamen hori ezagutzeko irrikaz egongo gara, datorren udan, gure jaialdian.

NEWSLETTER

Suscríbete a la newsletter y mantente al día con nuestra información.